Uy-joy sotib olishda propiska talabi bekor qilinganidan so‘ng o‘zbekistonliklar Toshkentda 13 mingga yaqin xonadon sotib olishdi. Ularning 70 foizi norezident tomonidan sotib olingan

Uy-joy sotib olishda roʻyxatdan oʻtish talabi bekor qilinganidan soʻng oʻzbekistonliklar Toshkentda 13 mingga yaqin xonadon sotib olishdi. Ularning 70 foizi norezidentlar tomonidan sotib olingan, deb xabar beradi Podrobno.uz muxbiri Adliya vazirligi maʼlumotlariga tayanib.

Eslatib o‘tamiz, prezidentning propiska tizimini isloh qilish to‘g‘risidagi qaroriga muvofiq, 2020-yil 1-apreldan Toshkent shahri va Toshkent viloyatida doimiy propiskaga ega bo‘lmagan fuqarolar ko‘chmas mulk sotib olishlari mumkin edi.

“Oxirgi 70 kun davomida ushbu imkoniyatdan foydalangan fuqarolar tomonidan 14851 ta uy-joy oldi-sotdi shartnomalari notariuslarda tasdiqlandi: Toshkent shahrida 12799 ta, Toshkent viloyatida 2052 ta. Qayd etish joizki, o‘tgan davr mobaynida mazkur hududlarda notariuslar tomonidan tuzilgan uy-joy oldi-sotdi shartnomalari umumiy sonining qariyb 70 foizini boshqa hududlarda ro‘yxatdan o‘tgan fuqarolar ishtirokidagi bitimlar tashkil etadi”, — deyiladi vazirlik xabarida.

Toshkent shahrida 20 yildan ortiq vaqtdan beri mavjud bo‘lgan uy-joy sotib olish yo‘lidagi to‘siqlarning bartaraf etilgani ham fuqarolarning uy-joy sotib olishda duch keladigan turli muammolarini hal qilishga yordam berdi.

Jumladan, ko‘pchilik fuqarolar Toshkent shahrida o‘z mulkini doimiy propiska bilan tanishlari nomiga rasmiylashtirib, keyinchalik o‘z uyida ijarachi bo‘lib yashashiga to‘g‘ri kelgani hech kimga sir emas. Davlatimiz rahbarining farmoni qabul qilinishi bilan bunday fuqarolar eng avvalo ushbu imkoniyatdan unumli foydalanib, uy-joyni o‘z nomiga rasmiylashtirdi.

Habar bergan: Podrobno.uz