Qay birini tanlash kerak: parketmi yoki laminat?

Pol qoplamasini terish – imorat ta’miridagi muhim bosqich. Sifatli pol shinamlik yaratadi, qulaylikka ta’sir ko‘rsatadi va xonadondagi uzoq muddatli sarmoya sanaladi. Shu sababli, do‘konga yo‘l olishdan avval ba’zi omillarni inobatga olish zarur.

Laminat

Laminat – bir-biriga yopishtirilgan, bir nechta qatlamdan iborat sun’iy pol qoplamasi. U melamin yoki boshqa sintetik materiallardan tayyorlanadi.

1. Tashqi qatlam qirilish va mexanik zararlardan asrovchi mustahkam himoya plyonkasidan tarkib topgan.
2. ikkinchi – bezak qatlami bo‘lib, yog‘och, keramik koshin, tosh va boshqa materiallarning teksturasi va rangiga o‘xshatib yasalgan. Ba’zan bu nostandart rasmlarni o‘zaro uyg‘unlashtirib, betakror dizaynlar yaratish mumkin.
3. O‘rta qatlam yuqori zichlikka ega tolali plitadan (HDF) bo‘lib, qoplamaning pichiq va  barqarorligini ta’minlaydi.
4. Orqa tarafidagi himoya materiali qoplamani namlikdan va deformatsiyalanishdan asraydi.

Toshkentda laminat xarid qilish oson. Mahalliy bozorda turli sinfga oid mahsulotlar taqdim etilgan. Masalan, eng oddiy materialning narxi 40.000-50.000 so‘mdan boshlanadi.

Standart pol asosi ustiga yelim yoki maxsus asbob-uskunalardan foydalanmagan holda o‘rnatiladigan plitkalar yoki panellar ko‘rinishida ishlab chiqariladi. Panellarni fiksatsiya tiizmi yoki klik-tizim yordamida bir-biri bilan birlashtirib, terib chiqiladi.

Bu turdagi qoplama yog‘och parket yoki keramik koshinlarga ko‘p pul sarflamay turib, ko‘rkam va mustahkam polga ega bo‘lish imkonini beradi.

Parket

Parket - yog‘ochdan tayyorlanadigan tabiiy material. Parket taxtalari har xil daraxt turlaridan ishlab chiqariladi: eman, shumtol, yong‘oq va boshqalar.

Uning turli o‘lcham va shakllari, terish usullari mavjud. Masalan, “baliq suyagi”, “shaxmat ketma-ketligi”, “parket taxtasi” kabilar polda turli naqshlar va rasmlar yaratish imkonini beradi. Yog‘ochning haqiqiy rangi va teksturasi orqali yaratiladigan tabiiy dizayn – mutlaq ustunlik hisoblanadi.  Bunday pol issiqlik va tovush izolyatsiyasining ajoyib namunasidir. Afzallik tomoni uzoq yillar davomida xizmat qilishidir. Bunday pollar to‘gri terilganda va foydalanilganda 50 yildan ortiq xizmat qiladi va o‘zining avvalgi holatini saqlab qoladi. Parketni randalash va qayta bo‘yash mumkin, shu bilan uning foydalanish muddati yanada uzayadi.

Laminatmi yoki parket, oxir-oqibat qay birini tanlagan ma’qul?

Ular orasidagi tanlov bir nechta omillarga bog‘liq:

-byudjet;

-uyning uslubi;

-trafik miqdori;

- shaxsiy did.

Agar moliyaviy ahvolingiz ko‘proq pul sarflash imkonini bersa va sizga tabiiy yog‘och ko‘rinishi yoqsa, u holda, siz uchun parket eng yaxshi tanlov. Ammo ba’zi tavsiyalarni inobatga olishni unutmang. Masalan, deformatsiyaga uchrashining oldini olish maqsadida parket terishdan oldin binodagi namlik darajasini tekshirish va pol yuzasini oldindan tayyorlab olish zarur. Uzoq yillar davomida yaxshi holatda saqlanishi uchun kelajakda maxsus parvarish vositalaridan foydalangan holda tozalashga to‘g‘ri keladi.

Ammo mablag‘ingiz cheklangan bo‘lsa va pol qoplamasini tozalash va o‘rnatishga alohida e’tibor qilishni istamsangiz, polga zarar yetkazishi mumkin bo‘lgan kichik yoshdagi farzandlaringiz yoki uy hayvonlaringiz bo‘lsa, u holda laminat sizga ko‘proq mos keladi, chunki u qirilishlarga anchayin chidamli.

Bu ikki qoplama o‘rtasidagi tanlov didingiz va uy yoki xonadonning aniq shart-sharoitlariga bog‘liqdir. Xarid oldidan mablag‘ingiz, joyning uslubi, trafik miqdori, farzandlar va uy hayvonlari va binodagi namlik darajasining hisobini oling. Har ikkala materialning ham kuchli va zaif tomonlari bor, shuning uchun barcha omillarni taroziga solib, aynan o‘zingizga mosini tanlang.