Dahliz uchun qanday jihoz tanlagan ma’qul?

Uyga kirib kelar ekan, mehmonlarning birinchi nazari tushadigan joy – bu dahliz. U turli o‘lchamlarda bo‘lishi mumkin. Bu uyning rejasi va egalarining tanloviga bog‘liq. Dahliz – xonadoningiz yuzi, shu boisdan, u uyning fayz-tarovatini aks ettirib, o‘ziga xosligini namoyon qilishi zarur.

O‘lchamlarini inobatga olamiz

Xonalar joylashuvidan kelib chiqqan holda, ular katta va keng yoki minimal kvadrat metrli kichik va ensiz bo‘ladi.

Zamonaviy interyer dizaynlari har qanday o‘lchamdagi xonadonlarni to‘g‘ri jihozlash imkonini beruvchi yuzlab variantlarni taklif etadi.

Ensiz dahliz uchun kichik o‘lchamli jihoz mos keladi. Masalan, o‘rindiqli va ustki kiyimlarga mo‘ljallangan kichik javoni bo‘lgan yuza jihozlari har qanday uyga mos tushadi. Kichik dahlizlarga, ko‘pincha, butun devor bo‘ylab yasalgan kupe-javonlar tanlanadi. Bunday javonlar dahlizni kengroq ko‘rsatish maqsadida toshoyna bilan bezatiladi.

Keng dahliz egalarining bu borada omadi chopgan. Ular o‘zlarini cheklamagan holda dahliz uchun mo‘ljallangan standart jihozlar to‘plami bilan xonani bezatishlari mumkin. Bunga, odatda, quyidagilar kiradi: yirik kupe-javonlar, o‘rindiqlar, poyafzal taxlash uchun joy, ilgaklar, ilgichlar va pardoz stoli.

Mos uslubni tanlaymiz

Jihozlar to‘plami interyer dizayniga mos ravishda tanlanadi. Agar xonadon hay-tek uslubda ta’mirlangan bo‘lsa, to‘plamni ham hay-tek uslubdagisini xarid qilish kerak. Agar ta’mir mumtoz uslubda bo‘lsa, u holda dahliz jihozlari ham mumtoz uslubda bo‘lishi lozim.

Qanday material tanlash kerak?

Uchinchi qadam – material tanlash. U pishiq va uzoq muddat xizmat qiladigan bo‘lishi kerak. Bu masalada ziqnalik qilmay, yog‘och, metal va sifatli oyna tanlash darkor.

Yog‘ochdan ishlangan jihozlar hashamatli hisoblanib, ajoyib sifat va ko‘rinishga ega bo‘ladi.

Oyna xonaga yorug‘lik va yengillik baxsh etadi. Dizaynerlar, ko‘pincha, o‘z interyerlarida oynavand to‘siqlardan foydalanadi. Ular xonaga zeb beribgina qolmay, joyni bo‘lish va ajratib turish vazifasini ham bajaradi.

Javon – dahliz uchun eng muhim xususiyat

Javon, shubhasiz, jihozlar to‘plamining asosiy unsuri hisoblanadi. U barcha zaruriy narsalarni saqlash uchun yetarli ravishda katta bo‘lishi lozim. Qisman ombor vazifasini ham bajaradi. Unda kiyimlar, qog‘ozlar, hujjatlar, idishlar, soyabon kabi kundalik foydalanishga zarurat tug‘dirmaydigan buyumlar saqlanadi. Uning ochiq va yopiq tokcha va tortmalari bo‘lishi mumkin. Javonning o‘lchamlari xona imkoniyatidan kelib chiqqan holda cheklanadi.

Poyafzal uchun jihoz

U poyafzallarni tartibli saqlash imkonini berib, polni ifloslanish va qirilishlardan himoya qiladi. Oddiy poyafzal javonlari, ko‘p qavatli tokchalar, ochiq taxmonlar yoki to‘laqonli javonlar – har kim o‘ziga mos nimanidir topadi.

Toshoynasiz bo‘larmidi?

Odamlar atrofidagi makonni hamisha oyna bilan bezatgan. Avvalo, u tashqariga chiqishdan oldin tashqi ko‘rinishga nazar solish imkonini beradi. Bu holatda tanlov interyer dizayni va uy egalarining istaklariga bog‘liq bo‘ladi.

Foydali mayda-chuydalar

Kiyim ilgichlar, kalit va boshqa mayda-chuydalar uchun yasalgan devor tokchalari, bosh kiyimlar va qo‘lqoplar, mobil telefonning quvvatlantiruvchi moslamalari va boshqa buyumlarni saqlashga mo‘ljallangan savatlar bezak vazifasini ham bajaradi.

Dahliz uchun jihoz tanlash – uyni tartibga solishdagi muhim qadam hisoblanadi. Uyning o‘lchamlarini inobatga oling, uslub va material, saqlash joylarini diqqat bilan o‘rganib, funksional javon tanlang.