Toshkentdagi xonadonlar tamiri

Xonadon ta’mirlash – hamisha dolzarb mavzu. Yangi uylardagi “qutiga” ko‘chib o‘tish, FV, nimanidir yangilash yoki xonadonning mahzun ko‘rinishi ta’mir haqida o‘ylashga majbur qiladi. Ammo ishni nimadan boshlash, qurilish xom ashyolarini qayerdan olish va yordam so‘rab kimga murojaat qilish kerak? Shu kabi va aytilmagan boshqa ayrim savollarga javoblarni quyida keltiramiz.

O‘zingiz qilganingiz ma’qulmi yoki o‘z ishining mohirlariga murojaat qilganmi?

O‘z qo‘llaringiz bilan ta’mirlash — bu bir qarashda u qadar ham qo‘rqinchli va murakkab mashg‘ulot emasdek tuyuladi. Mustaqil tarzda ta’mirlash uchun me’morchilik universitetini tamomlash yoki quruvchilar shajarasiga ega bo‘lish shart emas, faqatgina barcha kerakli anjomlar bo‘lsa va ulardan foydalanishni bilsangiz yetarli.

Internet va xohish-istak mavjudligi tufayli har qanday inson xonadon dizayni loyihasini yaratishi va uni hayotga tatbiq etishi mumkin. Ammo siz o‘z kuchingizga ishonmasagiz yoki mustaqil ravishda ta’mirlash uchun bo‘sh vaqtingiz bo‘lmasa, u holda o‘z ishining ustalariga murojaat qilganingiz yaxshiroq. Quyida biz xonadoningiz ta’miri uchun har ikkala variantni ham ko‘rib chiqamiz, shuningdek, foydali maslahatlar bilan ham bo‘lishamiz.

Kosmetik yoki kapital?

Xonadon ta’miri kosmetik yoki kapital bo‘lishi mumkin, ish hajmi ham qaysi turni tanlashingizga bog‘liq bo‘ladi.
Kosmetik (pardoz) ta’mir yengil bezak ishlari bilan xonadonning faqatgina tashqi tarafiga ishlov berishni nazarda tutadi. Kapital ta’mir (umumiy, asosiy) esa kosmetik ta’mirga nisbatan anchayin vaqt, kuch va mablag‘ talab qiladi. Bunga bino tuzilishini qaytadan o‘zgartirish, barcha kommunikatsiyalar, eshik va derazalarni almashtirish, yuzalarni tekislash va boshqalarni o‘z ichiga oladi. Bunday ta’mirni boshlagach xonadondagi barcha narsani almashtirish shart emas, ammo baribir sizni oldinda anchagina ish kutib turadi.

Agar xonadoningizni ta’mirlash kerak bo‘lsa va yaqin ikki oy ichida u yerdan ko‘chish rejangiz bo‘lmasa, aynan kapital ta’mir qilish qat’iy tavsiya etiladi.

O‘z kuchingiz bilan ta’mirlash

Birinchi navbatda xonadon ta’miri uni ko‘rikdan o‘tkazish, harakatlar rejasini va dizayn loyihasini tuzishdan boshlanadi. Xonadonni ko‘zdan kechirib va qay darajadagi ish hajmi oldinda sizni kutib turganiga amin bo‘lgachgina tayyorgarlikni boshlash mumkin. Internetmi yoki do‘stlar yordamida hal qilishingizdan qat’iy nazar ta’mir ishining o‘zi u qadar murakkab emas, ammo shunga qaramay ayrim tavsiyalar sizga asqotishi aniq:

1. Hamma narsani zahirasi bilan sotib oling. Kerakli bo‘lgan miqdordagi xom ashyonigina sotib olish bilan ehtiyotsizligingiz yoki zavod tomonidan yo‘l qo‘yilgan yaroqsizlikka duch kelganingizda paydo bo‘ladigan yetishmovchilik muammosiga duch kelasiz.
2. Materiallarni tanlashda murosa qilmang. Bu sizning xonadoningiz va sizning ta’miringiz, unda kamida 5 yil yashashingizga to‘g‘ri keladi. Shu sababli, gulqog‘oz, shtukaturka, deraza va boshqa narsalarni tanlay turib, o‘zingizga yoqqanini qidiring va oling.
3. Chegirmalardan qoching. G‘alati eshitilsada, bu ayni haqiqat. Chegirmada sizga sifatsiz plitka sotishlari ehtimoli yetmaganidek, kamiga siz bu plitkaning eng oxirgi kvardrat metrini sotib olasiz. Huddi shunaqa plitka qidirib, butun shaharni kezib, sarson bo‘lmaslik uchun chegirmalardan uzoqroq bo‘ling yoki ortiqchasi bilan xarid qiling.
4. Qurilish mollari sotiladigan bozor, do‘kon va marketlar ko‘pligi tufayli Toshkentdagi xonadonlar ta’miri yirik SM dagi shopingga o‘xshab bormoqda. Shunday ekan, barcha do‘konlarni aylanib chiqish uchun bir-ikki kun sarflashdan tortinmang, axir aynan u yerda siz xonadonning mukammal ta’miri va jihozlanishi uchun hamma narsani topasiz.
5. Gulqog’ozlarni yelimlashda, elektrni o‘tkazishda yoki boshqa ishlarda qiyinchilikka duch kelsangiz g‘am chekmag, shunchaki internetdan birorta videoqo‘llanmani tomosha qilib, mavzuga doir bloglarni o‘qib, tanishlardan maslahat so‘rang.

Parket yotqizish yoki santexnikani almashtirish kabi ba’zi o‘ziga xos ishlar uchun sizga baribir ustaning yordami kerak bo‘ladi. Biroq, boshqa barchasini o‘zingiz uddalashingiz mumkin. Qiyinchilikka duch kelganingizda maslahati yoki ishi bilan yordam bera oladigan internetga, do‘stlar, hamkasblar yoki qarindoshlarga hamma vaqt murojaat qilishingiz mumkin.

Quruvchilar brigadasining ta’miri

Brauzerda “Toshkentdagi xonadonlar ta’miri” tezkor so‘rovi orqali xonadoningiz qiyofasini yangilashga bajonidil yordam beradigan ko‘plab shirkatlar va xususiy brigadalarni topasiz.

Shuningdek, sizga xonadonni bezatish borasidagi barcha istaklaringizni qondiradigan hamyonbop ta’mir kerakmi yoki har bir elementi puxta o‘ylab chiqilgan, ma’lum bir uslubda bezak bermoqchimisiz, shuni ham darhol aniqlashtirib olishingiz lozim. Ikkinchi holatda quruvchilar bilan birga sizning barcha istaklaringizga javob tariqasida xonadonlarning bir necha xil dizayn loyihalarini taqdim etadigan dizayn studiyalari ham kerak bo‘ladi. Ko‘p studiyalar, ammo hammasi ham emas, loyihani topshirgandan keyin quruvchilar reja asosida ishlayotganini tekshirish uchun qurilish ishlari ustidan nazorat olib boradilar.

Quruvchilar brigadasini tanlab, xonadonning yangi uslubi borasida bir qarorga kelgandan keyin ta’minot bosqichi boshlanadi. Agar siz malakali dizaynerlar xizmatidan foydalangan bo‘lsangiz, xonadon ta’miri osonroq bitadi, chunku jami materiallar tanlovini ular o‘z zimmasiga oladilar, sizga esa bularning bari uchun to‘lovni amalga oshirsangiz kifoya. Ammo ta’mir davomida dizaynerlar ishtirok etmasa, u holda qurilish materillari tanlovi va ularni yetkazib berish sizning yelkangizga tushadi. Bir-ikki kun qurilish do‘konlari va bozorlarni aylanib, barcha kerakli narsalarni topishingiz mumkin, yuqorida yozganimizdek, “Toshkentda xonadon ta’mirlash – yirik SM dagi shopingga o‘shaydi”.  Bu yerda ham eng muhimi, “o‘z qo‘lingiz bilan ta’mirlash” bobidagi tavsiyalarga amal qilgan holda materillarni zahirasi bilan sotib olish va chegirmadagi mahsulotlardan uzoqroq yurish kerak. Suvoq va boshqa materiallar tanlovida usta quruvchilar bilan birgalikda bozor aylanib yoki tanlovni ularning o‘ziga topshirib, mahsulotning harid chekini taqdim qilishlarini so‘rash orqali amalga oshirish ham mumkin.

U yog‘iga xonadon ta’miri faqatgina quruvchilarning malakasiga bog‘liq bo‘ladi. Kerakli barcha narsalar sotib olinib, rejalar tasdiqlangach quruvchilar ishni boshlaydilar. Siz esa xotirjam o‘z ishingizni davom ettirib, ta’mirning qanday siljiyotganini tekshirish uchun haftada bir marta xonadoningizga tashrif buyurishingiz mumkin.

Brigada ishni yakunlashi bilan qabul qilib olishingiz uchun oxirgi marta xonadoningizga taklif qiladilar. Orzuingizdagi xonadonda turgan bo‘lishingizga qaramay, diqqat-e’tiborli bo‘lishni unutmang. Nuqsonlarni qidirib, xonadonning har bir burchini sinchiklab o‘rganing, chunki xonadonni qabul qilib olganingizdan keyin payqagan barcha kamchiliklaringiz faqatgina sizning muammoingizga aylanadi.

Bizning tavsiyalarimizdan, tanishlaringiz va oilangiz yordamiga tayangan holda nafaqat Toshkentda, balki boshqa hudud va shaharlarda ham xonadonni kapital ta’mirlash u qadar qiyin bo‘lmaydi. Ta’mirlash usulini tanlash faqatgina o‘zingizga bog‘liq, eng muhimi, hamma ishni o‘z qo‘lingizga olishdan qo‘rqmaslik kerak!