Xonadonlarning dizayn loyihalari

Xonadonda ta’mirlash ishlarini boshlashdan avval uning tayyor holatdagi ko‘rinishi, devor ranglari bilan jihozlar uyg‘unlashadimi, yo‘qmi, shularni aniqlab olish kerak. Bu holatda birgina tasavvurdan tashqari yaxshigina did va aniq hisob-kitoblar zarur, bunda dizaynerlar hamda xonadonlarning dizayn loyihalari sizga yordam beradi.

Xonadonlarning dizayn loyihalari

Xonadonning dizayn loyihasini yaratish — uni ta’mirlash jarayonidagi birinchi va eng muhim qadam. Albatta, siz xonadoningizning bo‘lajak ko‘rinishi, qanday gulqog‘ozlar yopishtirilishi, jihozlarning qayerda turishi, to‘siqni qaysi tarafga qo‘yish kerakligini tasavvur eta olasiz, ammo uyning rejasi bilan bog‘liq bo‘lgan ayrim jihatlarni payqamasligingiz yoki nimanidir qilolmay qolishingiz aniq. Pullarni havoga sovurmaslik, hamma ishni chiroyli bajarish va hisob-kitoblardagi xatoliklar tufayli o‘z hayotingizni xavf ostiga qo‘ymaslik uchun xonadonlarning dizayn loyihalarini ishlab chiqish talab etiladi.

Dizayn loyiha – bu sxemalar, chizmalar, suratlar, zaruriy qurilish mollari va boshqa ko‘plab ma’lumotlarni o‘z ichiga oluvchi, xonandon egasining mukammal interyer dizayni haqidagi orzularini hayotga tatbiq etuvchi, buyurtmachi va quruvchilar uchun mo‘ljallangan keng ko‘lamdagi qo‘llanma. Buyurtmachi bilan uzoq suhbat olib borib, uning barcha istaklari haqida ma’lumot to‘plangandan keyin hamma ish dizayner qo‘liga o‘tadi. Chizmalarni quruvchilarga topshirishdan oldin yorqinroq va batafsil tasvirlardan iborat interyer dizaynining taqdimoti buyurtmachiga namoyish etiladi, loyiha tasdiqlangandan keyinoq xonadonning xavfsiz va unumdor ta’miri boshlanadi.

Dizayner tanlash

Dizayn loyihasini yaratishda interyer dizayni bilan shug‘ullanuvchi har qanday mutaxassis yoki Toshkentdagi har qanday dizayn studiyasi yordam bera oladi.

Dizayner tanlayotganda uning tajribasi, obro‘si, tugallangan loyihalarining soni va professional ma’lumotga ega ekanligiga e’tibor qarating. Juda arzon baholangan faoliyatga ham ishonish yaramaydi.

Dizayn studiyasini topish mustaqil faoliyat yurituvchi dizaynerni topishga qaraganda anchayin tez bitsada, ammo studiyani tanlash birgina dizaynerni tanlshdan ko‘ra mashaqqatliroqdir. Bitta insonga taalluqli bo‘lgan saralash mezonlari endi butun studiyaga bo‘linadi. Narx bu yerda yanada muhim vazifani bajaradi, axir juda arzon narx studiya ishchilarining tajribasizligi, ehtimoliy xatoliklar va ish jarayonidagi tushunmovchiliklarga sabab bo‘lishi mumkin.  Nomdor studiyaning juda qimmat narxlari esa ularning professionalliklari bilan ham, taniqli nomning ustama haqqi bilan ham bog‘liq.  

Yana shuni yodda tutish kerakki, studiya yoki dizayner bilan shartnoma tuzishdan oldin quruvchilar ustidan mualliflik nazorati bo‘ladimi va qanday sharoitlarda loyihani qayta ishlash ehtimoli bo‘lishi mumkinligi haqida ham gaplashib olinadi.

Xonadonlarning dizayn loyihalari: nimalar kiradi?

Buyurtmachiga yoqadigan mukammal loyihani bir urunishda qilish qiyin. Barcha istaklar muhokama qilingach dizayner ishga kirishadi, interyer loyihasining o‘nlab variantlari orasidan mijoz istagiga mos keladigan ikkitaginasi namoyish etilishi mumkin. Rasmlar yoki interyerning 3 d renderlari bilan birga taqdimotga va quruvchilarning keyingi hujjatlari qatoriga quyidagilar kiradi:

- Xonalar tuzilishi;

- Shift, devor va pol rejasi;

- Kommunikatsiya, ventilyatsiya, eshiklarning joylashuv chizmasi;

- Jihozlar va boshqa uskunalar rejasi;

-  Binoning aniq o‘lchamli chizmasi;

- Shuningdek, xonadonning har bir burchiga tegishli bo‘lgan boshqa narsalar.

Kutilmagan vaziyatlar yuzaga kelganda, zaruratga ko‘ra chizma va sxemalar tog‘irlanadi, bu tez-tez sodir bo‘ladigan tabiiy holat bo‘lib, siz buning uchun qo‘shimcha to‘lov qilmaysiz.

Xonadonlarning dizayn loyihalari qancha turadi?

Mijoz istagi va imkoniyatiga hamda dizayner tajribasiga ko‘ra dizayn loyihalari narxi turlicha bo‘ladi. Dizaynerlar kvadrat metr uchun haq olishadi va bu 30.000 dan 200.000 so‘mgacha va undan yuqori narxlarda bo‘lishi mumkin, bu yerda qandaydir narx chegarasi yo‘q. Shu tariqa, 1 м² ni 200 ming so‘mdan hisoblaganda, 60 м² xonadonning dizayn loyihasi 12 million so‘mga aylanadi.

Ko‘pincha, dizayner va studiyalarda sizga va xonadoningizga moslashtirib berishlari mumkin bo’lgan tayyor ishlar katalogi mavjud ekanligiga ham e’tibor berish kerak. Agar siz mutlaqo o‘zgacha, nosandart va noldan boshlab siz uchun maxsus ishlab chiqilgan ishni xohlasangiz, u holda narxlar sezilarli darajada qimmat bo‘ladi.

Dizayn loyihani tuzish juda qimmatga tushishi mumkin, ammo u notog‘ri hisob-kitoblar tufayli yuzga kelgan xatolarni to‘girlashga sarf bo‘ladigan vaqtingizni tejab, xonadoningizga o‘ziga xos interyer va xavfsizlik bag‘ishlaydi.

Xonadonning interyer dizaynini yaratgandek uning dizayn loyihasini ham mustaqil tuzish mumkin, albatta. Biroq, siz xonadonning oldingi qiyofasiga ulkan o‘zgarishlar kiritish, to‘siqlar qurishni rejalagan bo‘lsangiz – professionallar xizmatidan foydalanganingiz ma’qul!

Xonadonlar dizayni, fotogalereya