Balkon dizayni va uni o‘zgartirish yo‘llari

Balkon – shunday joyki, u faqat narsalarni saqlash yoki kiyimlarni quritish uchungina mo‘ljallanmagan. Uni dam olish, ishlash yoki sevimli mashg‘ulot bilan shug‘ullanish imkonini beruvchi alohida burchak, o‘zgacha joyga aylantirish ham mumkin. Ushbu maqolada balkon dizayni, uning foydalanilishi hamda o‘zgartirish yo‘llarini ko‘rib chiqamiz.    

Balkondan foydalanish shakllari

Balkonni o‘zgartirishga kirishishdan avval undan qanday foydalanmoqchi ekanligingizni aniqlashtirib oling. Quyida bu borada bir nechta takliflar keltirilgan:

• Sport bilan shug‘ullanish joyi. Balkonni yoga yoki fitnes kabi sport turlari bilan shug‘ullanishga mo‘ljallangan joyga aylantirish mumkin. Bu yerga yugurish yo‘lakchasi, velotrenajer yoki turnik qo‘ysa bo‘ladi. Ochiq havoda tonggi mashqlarni bajarish salomatligingizga, albatta, ijobiy ta’sir ko‘rsatadi. 
• Ochiq osmon ostida kinoteatr. O‘zining kinoteatri bo‘lishini kim ham orzu qilmagan deysiz? Bir nechta yirik yostiq, issiqqina yopinchiq va proyektor olsangiz bo‘lgani. Osmon ostida maza qilib sevimli kinolaringizni tomosha qilishingiz mumkin bo‘ladi. 
• Ko‘ngilochar joy. Bu yerda do‘stlar bilan suhbat qurib o‘tirish, barbekyu tayyorlab, stol o‘yinlarini o‘ynash mumkin. Buning uchun kichikroq stol, bir nechta o‘rindiq, gril hamda dekor va shinamlik uchun ba’zi bezaklar bo‘lsa, yetarli. Masalan, dekorativ chiroqlar, yonib turuvchi naqshlar.

  Dam olish joyi yoki issiqxona

                Bu bo‘sh joydan foydalanishning nisbatan keng tarqalgan ko‘rinishi. Qulay divan yoki kreslo, kichikroq stol, yana dekorativ bezaklar qo‘ying. Qulaylik yaratish uchun har xil yoritgichlar va yostiqdan foydalanish ham qo‘l keladi. 

Agar siz bog‘bonchilikka qiziqsangiz, bu uyingizda o‘ziga xos issiqxona yaratish uchun eng yaxshi joy. Unda gullar o‘stirish, meva yoki sabzavotlar yetishtirish mumkin. Gullar ko‘zni quvontirsa, o‘z qo‘lingiz bilan yetishtirgan meva va sabzavotlar oilangiz dasturxonini to‘ldiradi. Buning uchun panjara va tokchalar o‘rnating, yetarlicha yorug‘lik tushishi va havo almashinuviga ham e’tiborli bo‘ling.

Balkonda kabinetga nima deysiz?

Agar uy ichida dars tayyorlash yoki ishlash uchun alohida xona bo‘lmasa, unda bu taklif to‘laqonli yechim bo‘la oladi. Bunday kabinet tinch va sokin bo‘lishi bilan ish diqqatni jamlash va ishchanlikning oshishiga yordam beradi. Kabinetga stol, stul, kitob tokchalari va kompyuter qo‘yish mumkin. Stolning ish uchun qulay bo‘lishi, o‘rindiqning esa ergonomik, ya’ni tanani charchatmay, ishchanligini oshiradigan xilini tanlashni tavsiya etamiz.    

Yorug‘lik darajasi o‘ziga xos muhit yaratishi va inson salomatligiga ta’sir o‘tkazishi aniq. Shu sabab stolga lampasi yoki devor chirog‘idan yorug‘likni oshirishda foydalanish mumkin. Interyer dizayni uy egasining didi va ehtiyojlariga bog‘liq, albatta.

Garderob

Garderoblar xonadonlardan katta javonlarni tobora siqib chiqarmoqda. Uyning bosh chizmasi har doim ham yotoqxonada alohida garderob yaratish imkonini beravermaydi. Shu sabab balkonda javon o‘rniga orzuingizdagi garderobni loyihalashtirishingiz mumkin.

Yopiq balkon bu o‘rinda ko‘proq mos tushadi. Uni kichikroq xonaga aylantirish osonroq kechadi.

Garderobda yopiq javonlar ham, ochiq tokcha yok kiyim solishga mo‘ljallangan qutilar ham ishlatilishi mumkin. Kiyimlarni saqlashda kerakli namlik miqdorini ta’minlash uchun havo aylanish tizimini o‘rnatishni tavsiya qilamiz. Shunda ochiq tokchalardagi kiyimlar yaxshi havo almashib turadi. Bu uni uzoqroq muddatga saqlashga yordam beradi. 

Oshxona – balkonda

Katta, yaxshi jihozlangan oshxona – har qanday uy bekasining orzusi. Ammo zamonaviy oshxonalar katta hajmlarga ega bo‘lmaydi. Shuning uchun ko‘pchilik oshxonani balkonga ko‘chirishni afzal ko‘rmoqda. Natijada joy ham kengayadi, yorug‘ va shinam oshxona hosil bo‘ladi.  

Bu ayniqsa, kichikroq uylarda, yirik oshxona mebellariga joy ajratishning imkoni bo‘lmaganda yaxshi yechim bo‘la oladi.

Dastavval balkonning maydonini aniqlash va shunga mos keladigan mebelning turi va o‘lchamini tanlash kerak. Misol tariqasida, 2 ga 6 o‘lchamdagi balkon oshxona uchun eng yaxshi variant. U unchalik katta ham, kichik ham emas. Bunday oshxona uchun alohida o‘lchamli mebel yasatishga buyurtma berish qiyinchilik tug‘dirmaydi. Bu joydan iqtisod qilishga yordam beradi, o‘rnatilgan jihoz va uskunalar esa foydalanish uchun qulay bo‘ladi.  

Balkon narsalarni saqlash uchungina xizmat qilmasdan, dam olish, ishlash yoki taom tayyorlash mumkin bo‘lgan to‘laqonli joyga aylanishi mumkin. Asosiysi – balkonni ta’mirlashdan qanday maqsad va vazifalarni o‘z oldingizga qo‘yayotganingizni aniqlashtirib olish.

Umid qilamizki, bizning maslahat va tavsiyalarimiz balkonda kreativ bir joy yaratishga sizni ruhlantiradi va balkon faqat keraksiz narsalar saqlanadigan joy bo‘lib qolmaydi.