Ikkilamchi bozorda kvartirani qanday olish mumkin?

Ikkilamchi bozorda kvartirani qanday olish mumkin?

Yangi kvartirani sotib olish – bu har doim har qanday inson hayotidagi muhim va ahamiyatli qadamlardan biri. Xarid qilayotganda, oldindan tayyorgarlik koʻrish kerak boʻlgan turli xil nozik jihatlar va oʻrinlarni hisobga olish lozim, shuningdek, tanlov muvaffaqiyatli boʻlishi uchun boshqa koʻplab maʻlumotlarni bilishga toʻgʻri keladi. Ushbu maqolada biz barchasini batafsil koʻrib chiqamiz.

1. Birinchi qadam ikkilamchi bozorda xohishga mos kvartirani topishdir.

Bu borada maslahatimiz:

Koʻpgina rieltorlar kvartirani bahor yoki kuzda sotib olishni maslahat berishadi, chunki ayni shu mavsumlarda sotuvdagi kvartiralar soni keskin ortadi.

“Ikkilamchi” kvartiralarni koʻpincha Internetdagi koʻchmas mulk yoʻnalishidagi turli xil portal va veb-saytlarda yoki eʻlonlardan, tanishlar yoki rieltorlar orqali topish mumkin, ammo sotib olishda biz bu yerda yozgan, ehtiyotkorlikni talab qiladigan oʻrinlar haqida unutmang.

Agar siz rieltorlik xizmatlaridan foydalanish haqida oʻylayotgan boʻlsangiz, unda bir nechta majburiy fikrlarga eʻtibor berishingiz kerak:

• Kompaniya rieltorlik faoliyatini amalga oshirish uchun litsenziyaga ega boʻlishi kerak

• Yaxshi kompaniyaning tajribasi uzoq boʻladi

• Internetdagi obroʻsi

• Kompaniya ishining barqarorligini koʻrsatuvchi sertifikat yoki mukofotlar

Ikkilamchi bozordagi kvartira narxlarning tushishi va oshishiga koʻproq duchor boʻladi va narx-navo yaxshigina tushganda anchagina mablagʻni iqtisod qilib qolishingiz va keyinchalik taʻmirlashga ishlatishingiz mumkin boʻladi.

Sotib olayotganda narx siyosatiga kvartiraning tashqi va ichki omillari taʻsir qiladi. Qulay hudud, uy yaqinidagi qulayliklar, hududning va uy yaqinidagi infratuzilmaning rivojlanganligi va boshqalar. Ichki omillardan koʻpincha kvartiraning turi, qavati va tuzilishi, maydoni hamda xonalarining soni, shuningdek, santexnika tarmoqlari va isitish turiga eʻtibor beriladi.

Tanlashda, keyinchalik yashash joyiga katta taʻsir koʻrsatishi mumkin boʻlgan turli omillarni hisobga olish kerak. Mana shunday omillarning namunaviy roʻyxati:

• Qulay hudud. Kvartirada kechadigan hayotingiz hududning osoyishtaligiga nihoyatda bogʻliq. Bunda nafaqat hududning oʻzi, maʻlum bir uyning joylashuvini ham hisobga olish kerak, masalan, odamlar koʻpincha katta yoʻl yaqinidagi xonadonlardan voz kechishadi. Koʻplar hududning ichkarirogʻidan kvartira olishni afzal koʻradilar, chunki katta yoʻllardagi avtomashinalarning shovqini farovon hayotga xalaqit beradi va bundan turli xil ovoz oʻtkazmaydigan materiallarni (gulqogʻoz, derazalar va boshqalar) sotib olish orqaligina maʻlum miqdorda xalos boʻlish mumkin.
• Yaqin atrofdagi qulayliklar. Boʻlajak farovon hayot uchun yaqin atrofda qulayliklarning mavjudligi muhim omil boʻladi. Kasalxona, poliklinika, dorixona, bozorlar, oziq-ovqat va xoʻjalik doʻkonlari, bogʻlar, sport va bolalar maydonchalari, maktab, bolalar bogʻchalari, mashinalar turar joylari va yaqin atrofda metro mavjudligi.
• Uyning holati. Uyning qanday holatda ekanligi va uning qurilishiga sinchiklab eʻtibor bering. Agar uy 80 yildan koʻproq vaqt oldin qurilgan boʻlsa, bunday joyda kvartira sotib olishni yaxshilab oʻylab koʻrishga toʻgʻri keladi, chunki bunday uydan foydalanish mumkin boʻlgan maksimal muddat – 100 yil. Kvartirani koʻzdan kechirishda devorlarning holatiga ham eʻtibor berish kerak. Baʻzan oddiy koʻz bilan devorlardagi yoriqlar yoki boʻrtib chiqqan gʻishtlarni koʻrish mumkin.

Shuningdek, ushbu binoni buzish va buni oldindan muhokama qilish masalasi koʻrib chiqishga arziydi.

2. Sizga mos keladigan variantni topib boʻlgach, tanlangan kvartiraga bogʻliq boʻlgan hamma narsani batafsil tahlil qilish bosqichi boshlanadi. Mutaxassislarning tavsiyalariga koʻra, uylarda kapital taʻmirlash har 10 yilda bir marta amalga oshirilishi kerak va oxirgi kapital taʻmirlash sanasi haqida egasidan soʻrash maqsadga muvofiq boʻladi. Agar u bir necha yil davomida oʻtkazilmagan boʻlsa va yaqin kelajakda oʻtkazilishi rejalashtirilgan boʻlsa, unda boshqa variant haqida oʻylagan maʻqul.

Kvartira mukammal taʻmirlangan boʻlsa ham, hudud ajoyib va barcha qulayliklar boʻlsa ham – teshilgan quvurlar va suv oqadigan tom barchasini yoʻqqa chiqaradi va, ehtimol, uyingizda amalga oshirilgan taʻmirlash ishlariga ziyon yetkazadi. Shu sababli, har doim ikkilamchi bozordagi kvartirada eʻtiborga molik barcha narsalarning holatini tekshirish kerak – tomdan suv oqmaydimi, kvartirada zaruriy simlar mavjudligi va qoʻshnilardan kommunal xizmatlarning holati haqida soʻrash foydali boʻladi, xususan, xonadonda soʻnggi paytlarda suv toshqini boʻlmaganmi va hokazo.

3. Sotib olish borasida yakuniy qarorga kelish jarayonida barcha kerakli hujjatlarni tayyorlash kerak.

Biz avvalroq kvartira sotib olayotganda qilinishi kerak boʻlgan ishlar tartibi va ​​rasmiylashtirilishi kerak boʻlgan hujjatlar toʻgʻrisida ma’lumot bergan edik.

4. Sotib olish jarayonining oʻzi va keyingi hisob-kitob. Xarid vaqtida, koʻpincha zaruriy narsalarni bilmaslik va firibgarlikning keng tarqalgan koʻrinishlari tufayli pulni yoʻqotish va u bilan bogʻliq boshqa muammolar roʻy beradi, bu haqda biz oldingi maqolalarda soʻz yuritgan edik.

Xulosa qilib aytadigan boʻlsak, sizga kerak boʻlgan eng muhim narsa – qanday kvartira (ikkilamchi bozordagi kvartira yoki yangi qurilgan turar-joy)ni xohlayotganingizni aniqlashtirish; uni oʻzingiz topishingiz yoki rieltorlik xizmatlaridan foydalanishingiz; kvartiraning narxi va holati bilan tanishish; barcha kerakli hujjatlarni tayyorlash; bitimni toʻgʻri tuzish; va nihoyat, sotib olingan yangi kvartiraga koʻchib oʻtish va hayotdan zavqlanish!