Kvartira oldi-sotdisini rasmiylashtirish

Hujjatlarni tayyorlash – har qanday kvartirani sotib olishdagi muhim bosqich va u oldindan tayyorgarlik koʻrishni talab etadi. Agar barcha rasmiyatchilik ishlari xarid oxirida qilinsa, shartnoma tuzish va rasmiylashtirish jarayoni choʻzilib ketishi mumkin. Ushbu maqolada siz kelajakda xaridingizni muvaffaqiyatli amalga oshirish uchun zaruriy hujjatlar haqida barcha kerakli maʻlumotlarni topasiz.

Oldi-sotdi shartnomasi

• Muhim hujjatlardan biri Oʻzbekiston Respublikasining amaldagi Fuqarolik kodeksiga muvofiq tuzilgan oldi-sotdi shartnomasidir. Tuzilgan shartnomaga har qanday koʻrinishda rioya qilmaslik bitimning bekor qilinishi va haqiqiy emasligini anglatishi mumkin. Oldi-sotdi shartnomasining asosiy shartlari Fuqarolik kodeksining ikkinchi qismida, yaʻni koʻchmas mulkni sotish toʻgʻrisidagi 479-moddada koʻrsatilgan.
• Shartnomaning oʻzi Oʻzbekiston Respublikasi Fuqarolik kodeksining 488-moddasiga muvofiq, notarial tasdiqlangan va davlat roʻyxatidan oʻtgan boʻlishi kerak. Shuningdek, u sotilgandan keyin turar-joydan foydalanish huquqini saqlab qolgan shaxslarni (agar mavjud boʻlsa) koʻrsatilishi kerak.
• Oʻzbekiston Respublikasi Fuqarolik kodeksining 484-moddasiga muvofiq, shartnomada xaridorga oʻtkazilishi lozim boʻlgan uy-joyni belgilovchi maʻlumotlar boʻlishi kerak. Maʻlumotlar, shuningdek, mulkning joylashgan joyi: yer uchastkasi yoki boshqa mulkning bir qismi sifatidaligi toʻgʻrisidagi maʻlumotlarni oʻz ichiga olishi lozim. Ushbu maʻlumotlar boʻlmasa, shartnoma “tuzilmagan” deb hisoblanadi.
• Uy-joy shartnoma shartlari bajarilmagan holda boshqa shaxsga oʻtkazilganda taqdirda, xaridor kamchiliklarni tekin bartaraf etish va yetkazilgan zararni qoplashni talab qilishga haqli. Kompensatsiya barcha ehtimoliy xarajat va zararni qoplashi shart, qolaversa, narxni mutanosib ravishda pasaytirish ham talab qilinishi mumkin. Agar kelishuvga erishilmasa, shartnoma yetkazilgan zararni qoplagan holda bekor qilinishi mumkin. Ushbu band va shartlar Oʻzbekiston Respublikasi Fuqarolik kodeksining 434-moddasida koʻrsatilgan.

Hujjatlarni tekshirish

Notariusga borishdan oldin, shartnoma toʻgʻri toʻldirilganligi va barcha majburiy bandlar koʻrsatilganligiga ishonch hosil qiling. Sotuvchining ruhiy salomatligi, uy egalari soni, qayta qurilgan joylar va boshqalar kabi eʻtibor qilish kerak boʻlgan oʻrinlarni avval bayon qilgandik.

Notariusga yoʻl

Uzoq kutilgan uy-joy tanlovidan soʻng siz va uy egasi notariusga murojaat qilishingiz kerak.

Oʻzingiz bilan quyidagi hujjatlarga ega boʻlishingiz kerak (jismoniy shaxslar uchun):

1. Shaxsni tasdiqlovchi hujjat.
2. Mulkka egalik huquqini tasdiqlovchi hujjat.
3. Kommunal xizmatlar uchun qarzdorlikning yoʻqligi toʻgʻrisidagi maʻlumotnomalar.
4. Sotilayotgan uy-joyda doimiy roʻyxatga olingan shaxslar toʻgʻrisida maʻlumotnoma.
5. Barcha mulk egalarining roziligi.
6. Umumiy ulushli mulk ishtirokchilari oʻrtasida umumiy mulkda boʻlgan uy-joydan foydalanish boʻyicha kelishuv.
7. Mulk davlat reyestrida roʻyxatdan oʻtgani toʻgʻrisida koʻchirma.
8. Zarur hollarda soʻraluvchi boshqa hujjatlar.

Soʻnggi qadam

Qarzdorlikning yoʻqligi haqida maʻlumotnoma olish uchun YIDXPga elektron ariza topshirish mumkin. Qarzdorlik yoʻqligi haqida javob olingach, ushbu arizaga alohida raqam beriladi. Kun davomida davlat boji toʻlanganidan keyin ushbu bitimni notarial tasdiqlashga ruxsat beriladi.

Umumiy olganda, oldi-sotdi shartnomasini bir oy ichida davlat roʻyxatidan oʻtkazilishi kerak.

Yechimi bormi?

Oldi-sotdi jarayonini yengillashtirish uchun rieltorga murojaat qilinsa, maqsadga muvofiq boʻladi. Rieltorlik xizmatini koʻrsatuvchi kompaniya buni “Rieltorlik faoliyati toʻgʻrisida”gi qonunga muvofiq amalga oshirishi kerak. Rieltorlar xaridorga zaruriy hujjatlarni toʻplashda, shuningdek, barcha maʻlumotnoma va guvohnomalarni olishda yordam beradilar. Bu xaridorning vaqti va kuchini tejashga xizmat qiladi